مشاهد من شارع المتنبي [الأرشيف] - أنوار المدينة المحمدية

أريج الياسمين

11-02-2007, 12:44 AM

بعد ان شرت قبل فترة ليست بالبعيدة قصيدة كانت بعنوان ( رثائية شارع المتنبي ) وكانت الرثائية مشروع قصيدة
ها انا الان انهي مشروعي بقصيدة اسميتها ( مشاهد من شارع المتنبي ) أستميحكم عذرا واسمحولي ان اتجول معكم بين ركام العلم ، والادب ، لأقدم لكم هذه المشاهد

************************************************** ********

مشاهد من شارع المتنبي

شفته ينزف ...

والحزن غيّر اوصافه
وما شفت دم عله جرحه ؟!
شاعر ومن ينجرح .. ينزف ترافه !!
وما عرفته ؟!
الاّ من دنّك عله كتابه ، وبجه ، ورجفت شفافه .
جان مكتوب بغلافه المتنبي ...
وصدفه لن انمسحت حروفه الاخيرة
وبقت بس ( مت ) بغلافه !!
امر بالموت اقتحم حته الثقافة
وامر من الموت ماكو ...
من يجيك بهل صلافه ...
من يجيك .... يريد يعلن عن فراغه ؛؛
ونعم اعلن عن فراغه ؛؛
وتدري ليش انفجر حقده بهل مكان ؟؟
لأن شاف ابين الاف الكتب نهج البلاغة !؟
ليش الا بهل مكان
تريد تعلن طائفيتك ؟؟
وانته تدري السوك .. ما عنده مثل حقدك ونيتك
ومن يسألك عل كتاب اللي تريده
يريد منك فكر ما يطلب هويتك ؛؛
هنا
شفت امرئ القيس الوكف يبجي
من نظر ابياته تتبعثر بأقدام الشضايا
قفا نبكي ....
جن سمعته يكول مابين الدخول
وبين الاف الضحايا !!
وجن صفت خنسه الشوارع ؟
عينهن عل شارع الما مرّه فرغ
من صوت ناسه ...
وجن خيال الخنسه مر بهل مكان ؟!
تريد تعرف صخر وين الموت داسه ؟!
تريد تتفقد علمها .... البيه تأتم الهداة
وصوت دم الجرح ناداها بشراسة ..
بهل مكان الشعر مااات
هنانه ممنوعة الحياااة
اعذرينه ...... شلون نأتم بعلم
مكطوع راسه ؟!!
ويانزار بياقصيدة غزل نكدر
نشعل شموع السلامة ؟؟
وقاتلي يرقص حافي القدمين
بمدخل جروح اليتامة !!
والروايات العليهن دمنه
بيهن ينقرن كل السوالف ؟
الرصيف اصبح رواية !!
الجدار اصبح رواية !!
اتلمّس الحيطان مد ايدك عليهن
ليش خايف ؟؟
راح تلكه جلاد همسات الضحايا
مفهرسه بيه المواقف
ص 1 ،، طفل جان يريد دفتر رسم
يرسم بيه وردة ، ومزهرية
وصدفة لن الموت اخذ كل امنياته
ورسم بجروحه شضيه !!
ص رقم ثنين ،، لحظة انفجار
وصوت جامع صاح حي عله الصلاة
والجثث اسراب طارت
صلّت بوضع الممات !!
طحنه بس كلنه ارتفعنه
ومن تركّز بينه نصعد ما نطيح
جثة المسلم انصلبت
فوك دمعات المسيح ...
ودمعة الصبي توضّه ....
الشيعي والسني بحزنها
وأمي سنية ... ولكن
بالصلا ماميّزت ياهوه ابنها
جان من يتجتف تعرفه ابنها
وهسه صدفه الموت اجاها
وباكه منها
باوعت شافت صلاة الموت
وكفت حايرة ابّين الصفوف
وصوت ابنها يكلها يمّه
الموت وحدنه ييمّه
لان كل احنه نصلي بلا جفوف !!
وبمزاد الخوف ... جان الموت
بينه يبيع جملة
وشفت جثة آية محتركة
وبقت من عدها جملة
( وجاء من اقصى المدينة رجل يسعى قال ياقوم اتبعوا المر ..... )
واتبعنه المر .... !!
لأن ماظلت بريج الوطن نكهة حلا
الرجل جان العراق
وجاي من اقصى الحروب
وترك جم جثه وراااه !!
شاف منظر ليل بردان وتغطه
بجرح شاعر
وشاف جنطة سفر بيها خيوط
من عصابة امي المارضت
فد يوم اسافر ....
وآنه هسّه مسافر ورايد رضاتج
يمه اسمع صوت صاح اشّا
غطّيه ابعباتج
هذا صوت الشّا بندر
تغطه بالقرآن يمّه
وفارش الانجيل مندر ...
يمّه من هذا المكان ... الوطن
حزّم امتعة حزنه وتعنه
يريد من عيونج يرش بمكان
الدمع ماااااي
واخذ بسمة طفلة غلفها بحزن
سووك السرااي
او وكف شايل حلم شعبه
وينتظر يوصل سراه
وآنه شايل روحي بيدي
وانتظر يوصل سراي

_________
منقول للأمانة